Fixen
o meu debut teatral no colexio. Cantaba unha panxoliña
disfrazado de porquiño. Foi unha experiencia decepcionante.
Ese día prometinme que non descansaría ata atopar
papeis máis dignos, máis hixiénicos. De
seguida comprendín que o único lugar onde podía
atopalos era o meu váter.
Encerreime nos lavabos do colexio para latar a clase de matemáticas.
Nun arrebato escribín na parede: "Ser ou non ser".
Á mañá seguinte descubrín que alguén
puxera debaixo: "Perdín un ovo”. Perante a
E.X.B mantiven unha relación filosófica con ese
neno baseada no anonimato. Pasou moito tempo. Agora el é
animador cultural.
Tres cubalibres chegaron a convencerme de que era o príncipe
Hamlet e debía ir, á saída da "disco"
atoparme co espectro do meu pai. Cando o tiven enfronte e lle
chamei pantasma, castigoume un mes sen saír. Pasei todo
o inverno no meu váter, coa mosca detrás da esponxa.
Recibín o meu primeiro curso de teatro. Moi amablemente,
regaláronnos a cuarta parede. Eu, como non sabía
onde poñela, coloqueina no meu cuarto de baño.
Aquela tarde asomeime ó corredor e berrei: "Nai,
mañá non vou a clase; a partires de hoxe farei
teatro independente!". Na penumbra, unha man peluda indicoume
que falara baixo. Estaban vendo Luar.
Pasei
a segunda quincena de agosto pechado no meu váter, preparando
unhas oposicións de maxisterio. Namentres cantaba "Os
gatiños" aprendín a amar a expresión
corporal.
Desde hai anos (no que saín do baño para ir a
un casting pero volvín axiña porque me mandaron
fritir ovos) ata hoxe, sigo atrapado polo feitizo e a inspiración
dos cartos de aseo. Traballei nunha compañía que
se chamaba "Toaletta", o noso local é o máis
parecido a un urinario e dannos subvencións para mexarse
da risa.
GÉNERO : Comedia
AUTOR E DIRECTOR : Maxi Rodríguez
ACTOR : Jouse García
TRADUCCIÓN : Clara Vázquez
TÉCNICO : Ramón Paz
