O que van ver e escoitar aquí é material de primeira man. Criminais que realizan confesións, sen conta, de plano, de canto, directas, sen máis desexo que explica-lo seu arrouto. Confesións que se fixeron tentando, sen dúbida, poñerse a ben con Deus, fuxindo do pecado. Hai que recoñecer que os homes somos como nos fixeron e querernos facer responsables do que, de súpeto , nos empuxa a saír de nós mesmos é un orgullo que eu , persoalmente, non comparto.
Imos escoitar a pao seco as razóns nada escuras que os levou ó crime, sen outro motivo que se deixar arrastrar polo seu sentimento. Inxenuamente, todos eles din verdades.
Veremos tamén crimes de todo tipo e algunhas das situacións que os provocan. Hainos de tódalas clases e variedades e, tal e como están os tempos, foi moi sinxelo facer unha escolma. Polo xeral , o espectador é moi sanguiñento e todo o que esixe do crime é unha apaixoada fervenza de sangue... chof, chof, chof...; o espallamento ostentoso neste caso chega para satisfacer á maioría do público, aínda que nós tamén nos lembramos do coñecedor advertido, aquel que ten gustos máis refinados.
Pero todos estes criminais, absolutamente todos non saen do que son. Non se gaban. Danse a ver con sinxeleza. Soamente piden a súa comprensión.
O home de hoxe soamente ten en conta o fracaso. Non imos a ningures. O grande anceio é, agora, a mediocridade: vence-los impulsos. No seu submundo, estes humildes criminais vanse explicar aquí sen saber sequera como. Son tan mediocres coma todos nós , que non nos atrevemos a berrar no enorme proceso do noso tempo. Aceptamos o que nos impoñen adrede. Non discrepamos. Todos de acordo.
Endexamais estivemos tan preto da terra. E tragaranos sen rastro. Non lle botemos a culpa a ninguén. Perdeuse a sementeira. Quizais polo mal tempo.

DURACIÓN : 1 h. 10 min. aprox.
XÉNERO : Comedia
TEXTOS : Max Aub , Shakespeare.
ACTORES : Josi Lage e Jouse García
TRADUCCIÓN : Xosé Prada
TÉCNICO : Lois Soaxe
DIRECTOR : Roberto Cerdá

TEMA : O crime visto como arrebato, os malos tratos físicos e psíquicos de homes a mulleres e de mulleres a homes, a pena de morte, a frialdade e pasividade coa que esta sociedade ve pasar ante si a inxustiza que se comete no mundo .
Os actores dan vida a máis de 40 personaxes. O espectáculo componse de varias escenas individuais que teñen vida propia conexas entre sí polo tema e pola música (gospell e jazz).

AGRADECEMENTOS :
Casino do Carballiño, Editorial Calambur, Sergi Belbel.